韓味Top.1 邪惡芝士豬排骨！

芝士係萬惡的食物！PND絕對了解，由細細個勁唔鍾意老麥魚柳包入面塊豬屎，進化到而家無芝不歡，火熱動感「芝士豬排骨」又多一員喇！

呢間上樓小店目測韓味達90%，樓面有靚仔oppa又有韓國靚女(我唔好意思偷影)，Menu有成 十多頁，好多選擇！其間，靚仔oppa為PND送上5碟泡菜同前菜，仲簡單介紹埋每一樣前菜，服務真係好貼心！

有韓燒、小食、有飯有麵，其中必點嘅當然係大大鑊「芝士豬排骨」啦！$188/2人份量有大約5-6條豬排骨(menu寫一人前但真係無可能)！

Oppa會幫你捲芝士，當然，你可以自己捲啦！開火見到芝士由一粒粒溶到可以夾起一條條芝士絲！醬汁自家調味，辣辣濃郁同惹味度更加正宗，醬燒豬排骨其實已經燒到鬆化入味！捲埋軟滑嘅芝士一齊食，夠哂開心！

 同首爾原版一樣，2cm厚嘅芝士煮溶後可以拉到好高好高，質地唔油膩，入口香軟，唔會令人感覺飽滯，不過呢度就無放醃青瓜同粟米粒！

有食過韓國版本嘅潮友，應該會好掛住弘大 James 濃郁無比嘅芝士同豬排骨，PND早前就試過灣仔銅鑼灣交界果間，相比之下，尖沙咀呢間比韓國原版仲要再正宗啲再好味啲，芝士再軟熟啲，就算凍咗，都無結成硬身！

外面街賣緊$40的Hite，呢度只係賣$30一枝，兩人Share都唔會覺得肉赤！

MENU仲有芝士烤豬腸呢，下次可以食埋！

 最後，呢度都可以叫飛魚籽飯$98，可以將啲芝士同醬汁加入飯入面撈，完全係無敵，加埋泡菜同紫菜，其實3-4人食都夠哂飽！

不過PND今次就試咗牛肉石頭飯$88，可以任用醬汁！

最後，埋單後店員送上梅子凍茶一杯俾我地清清油膩感，入口酸酸甜甜好開胃！

 #PND韓國菜 #PND燒烤 #PND尖沙咀 #PND佐敦

Mon-Sun 12:00-14:30;18:00-00:00

電話：22523899

@佐敦彌敦道219號莊士倫敦廣場5樓