2015年3月19日 星期四

首爾明洞 - 狂捲詹士芝士豬排骨


終於終於,PND可以帶大家去明洞試吓火熱動感弘大出世嘅James Cheese Back Ribs (제임스치즈등갈비) 喇!



明洞有幾好行幾好買真係唔洗再講,就喺PND買到一袋二袋,攰到想死之際,抬頭一望,竟然係最近紅到發紫,喺香港開到成行成市既芝士排骨!諗都唔洗諗,梗係即刻入去坐低食返餐好既先啦!睇返餐牌,一人份量由14000won起 (起碼要點二人份),芝士份量有三種:普通量 (치즈보통)、好多芝士 (치즈많이) 同好多好多好多芝士 (치즈많이많이)!辣味亦有三種:唔辣 (순한맛)、辣 (매운맛)、好辣 (초매운맛)!


PND今次就揀左好多芝士 (치즈많이) 同辣 (매운맛),潮食友們請留意返,韓國既野食全部都好大份,PND叫左二人份,但實際上係完全足夠三人食用!


當啲芝士溶到七七八八既時候,侍應就會自動自覺走過黎幫你剪開啲排骨,完全唔洗自己郁手!詹士啲排骨喺上碟前已經燒到鬆化入味,咬落去啖啖肉,份量十足!再加埋自家調味既辣辣醬汁,簡直係濃郁同惹味到極點!

講完排骨點可以唔講吓今餐既重點 - 芝士!詹士既芝士出名唔油膩,係唔會令人飽滯果種芝士,足足2cm厚嘅芝士上放咗啲醃青瓜同粟米粒,開火見到芝士慢慢由一條條溶到可以夾起一條條芝士絲,真係大滿足!而哩到既侍應亦好識做,通常只會幫你捲一至兩條排骨,之後就會留返俾食客自己慢慢玩慢慢捲,成晚就係不斷咁捲芝士,好幸福呀!



唔好以為食完個排骨咁就完,未!有去過韓國既朋友仔都知道,韓國既餐廳最興就係食完野之後加個炒飯,詹士都唔例外!PND建議無論食到幾飽,最後都一定要加個飛魚籽飯 (날지알 볶음밥) 落鑊炒起!一粒粒飛魚籽逐粒逐粒喺口度爆汁,加埋鑊入面剩低既芝士、豬排骨醬汁,泡菜同紫菜飯,完全係無敵,絕對可以令你飽到捧住個肚離開!

補充:PND強烈建議去明洞/新沙既詹士,因為完全無人排隊,唔使去弘大總店同人迫,除非你真係好想好想順便食埋爐邊蛋啦(但其實同其他韓燒嘅無咩分別)



 明洞店:서울시 중구 명동2가3-1 (首爾中區明洞2接3-1) 
點去:地鐵4號線明洞站8號出口,行約5分鐘(12pm-11pm)













沒有留言:

張貼留言