2015年3月3日 星期二

心夜來潮食最「潮」宵夜!醬蟹出沒注意!



假如PND半夜心血來潮想食吓宵夜,一定老遠都走過嚟旺角街市附近嘅我最喜愛嘅醃醬蟹、醃海膽、醃蠔仔、面猴同小米餃喇!




睇開PND嘅潮友可能會覺得我好少介紹中式食品,不過一介紹就真係要試吓,因為一定係大件夾好味!小店唔算好大,主要以兩邊4-5位Bar枱同埋4-5張圓枱、長方枱為主。



小店主打潮汕家鄉小食,你話係咪鄉下野?係呀,仲係「潮」爆同好好味嘅家鄉特式菜


裝修型格,雖然舖位細細,但坐得尚算舒服,聽講小店遲啲仲打算做埋24小時營業,咁就幾時都可以「潮」聖啦!



好似喺香城Hit咗兩年嘅韓國醬油蟹,呢度就大玩潮汕版,醬醃膏蟹$98(大)(唔辣)要WHATSAPP預訂,配白飯,夠兩人份量,醬油呢?原來已經入哂新鮮蟹肉入面,咸香鮮甜...第一啖已經上咗癮! 


所以潮汕嘅生醃海鮮嘅花名係「潮汕毒藥」。





PND叫埋一碟碟醬醃海膽$28、醬醃生蠔仔$28,前者重味味啱撈飯,後者蠔仔細細粒好鮮甜!每樣鮮味同濃郁到爆炸,撈飯超正!以後排唔到佐敦就嚟呢度食啦!




店長兼老闆就介紹,粿條先係潮汕粉面嘅表表者,好似「小米餃」$18咁,就用咗好似粉果咁煙煙韌韌嘅皮嚟包住豬肉,拌蠔油食夠惹味!




仲有手工捻面猴$28/小;$38/大(超餓可以試大)! 



咩係面猴呢?其實,面猴就好似以前大人meet細路仔(猴孩)塊面咁隨心捻出一塊塊麵。




湯底嘅風味就似足潮友鐘意嘅狗仔粉,魚鮮味、菇類、八爪魚仔、蝦米...,仲可以撈埋佢地自家用磨碎咗嘅蝦殼煮成嘅醬汁,「面猴」綿身有口感,好易入口,勁快就食哂成碗!




最後口痕痕叫埋「正宗手打牛丸」$28,最奇嘅一點就係特平時唔食牛丸,但呢度牛丸喺潮汕以黃牛肉即打運落嚟,店長打趣介紹,由牛肉變成牛丸只有不足一日嘅時間,而且粒粒手打,食落口又真係仲食到非常強烈嘅牛味,而且彈力十足,學《食神》咁當乒乓打可能都掂,真材實料!






仲有佢地自家製嘅辣醬,食落好香,餘韻幾強,咸咸香香用嚟調味或撈飯也可。


店家以蝦殼煮爛,調製而成嘅醬汁,用嚟撈「面猴」食,可以十倍地加強鮮味。





平靚正,此聖值得一「潮」! Mon-Sun 11:00-03:00(宵夜皇PND啱哂)

心夜來潮 - 潮汕食堂

電話 / 訂蟹:WHATSAPP 95785454
@旺角塘尾道18號嘉禮大廈下地舖A
(旺角C4出口,一出見到朗豪坊H&M,直行至見到天橋,就係天橋旁隔離)







沒有留言:

張貼留言