2015年3月24日 星期二

麥記美食 - 性價比高港滬大排檔!此老麥非彼老麥!


麥記?唔通PND要推介佢地個將軍?唔係呀,此老麥非彼老麥!呢間麥記喺北角堡壘街露天位置,有太陽嘅日子去就啱哂喇!




潮友報料著校服嘅會送多一隻餃子/生煎! 招牌小籠包$20/5隻一籠,要等15-20分鐘俾小店蒸熟!小籠皮夠薄,一啖咬落去,肉質鬆化,調味好夠,咸咸香香,無咩肥肉,而且好多汁!



擔擔麵$15一碗,唔講唔得,成碗嘅花生醬味都好濃郁,唔係非常杰身,但味道攞爆分,麵質似生麵,唔太幼身,幾有咬口,而且浸咁耐都無發漲,確係零舍唔同!




招牌窩貼/生煎包都係$10/4隻,真係好抵食!兩種嘅包底餃底都煎到金黃香脆,肉汁睇圖就知夠豐富,叫足廿蚊已經飽哂!



酸辣湯麵$23一碗,湯底無中伏,連豬紅都搵到,酸酸甜甜夠濃郁,鐘意碗仔翅嘅潮友啱哂!



麥記小食
@北角堡壘街21-23號美嘉洋樓地下(PND去呢間) 
Mon-Sun 11:30-21:00 
@新蒲崗彩虹道242采頤花園地下

沒有留言:

張貼留言