2015年3月30日 星期一

首爾景福宮 - 朝聖!進補!暖胃人蔘雞湯!


冬天去首爾,天寒地凍,一片白濛濛,最啱就係食啲又養身又暖胃嘅野食!做完歷史學家行完景福宮,無理由唔兜過去食返煲土俗村人蔘雞呀?



土俗村應該係首爾市內數一數二既人蔘雞專門店,呢到唔單止多遊客,就連韓國國民都好鍾意去!喺韓國,有個原理叫「以熱治熱」,即係指藉住好熱既天氣加埋食好熱嘅野,將身體裡面嘅毒素通過流汗排出!

所以啲人通常都習慣係夏天先食人參雞,咁就可以喺排毒嘅同時吸收返人蔘雞嘅養分,調理身體!不過‥‥‥我地係香港人嘛!香港人幾怕凍你都知架啦!凍到可以得-16度,理得你係咪夏天補品,暖胃最緊要,如果唔係仲邊有力氣周圍玩!?




由於「土俗村」實在太出名,所以PND今次就教潮友記住記住記住,要避開食飯時間去「補身」!

PND大概朝早11點鐘去到,該時段完全無人,咁大家就可以舒舒服服咁食啦!建議潮食友們都可以哩個時間左右去到食返個brunch,補充體力,再開始一整日既行程喇!


土俗村有好多款人蔘雞可以選擇,包括蔘雞湯、烏骨蔘雞湯、漆雞湯、藥膳燉雞乜乜乜,PND就揀左最普通既蔘雞湯 (15,000won)!

蔘雞湯上到黎仲滾緊嫁!個湯睇落無乜特別,以為會淡而無味?其實個湯底係用左30幾種藥材熬製而成,所以味道係非一般程度嘅濃郁!淨係飲一啖湯已經好醒神,你會感覺到身體係會由裡面暖到出嚟,再由出面暖返到裡面!

至於雞肉方面,嫩滑就係一定嘅!輕力地用筷子一夾已經可以將雞肉撕開!雞件裡面放滿晒人蔘、紅銀杏等衡氣活血嘅食材!主角人蔘仲有半隻手掌咁長!非常足料!食完即刻覺得啲血氣都運行得快啲!得湯同雞驚唔夠飽?洗乜驚!雞裡面仲有滿滿的糯米,糯米同雞肉可以分開食,將糯米撈混喺個湯到,好似食粥咁食亦得!得左!

如果平時係食開重口味既朋友,亦都可以加少少鹽或者將附送嘅人蔘酒倒落煲蔘雞湯到!即刻將煲又補身又暖肚既蔘雞湯昇華到另一層次!另外,亦會有啲朋友好怕人蔘陣味 (其實PND都好怕),但係蔘雞湯就唔會有呢個問題!上面都提過,因為佢用左好多款藥材一齊熬個湯底,所以個湯基本上已經吸收晒各種藥材既精華,蔘味唔會特別出!


토속촌
 地址:서울 종로구 자하문로5길 5 (체부동) 
首爾市鍾路區紫霞門路5巷5 (體府洞)
營業時間:10:00 - 22:00




沒有留言:

張貼留言