2015年3月26日 星期四

最潮手工點心配鐵觀音Latte!



好多潮食友都同PND講:PND你呢啲韓仔性格,咁少食中菜嘅係咪唔會去飲茶架?PND:嗱其實唔係嘅!呢間型格小茶室,成間cafe咁,食點心,唔一定配茶架,花茶、咖啡甚至手工啤酒配點心都得架!呢度咁潮,咪吸引咗PND嚟囉!



牛頭角站出會近少少,由宜安街市隔離嘅小巷行上少少,紫色嘅裝修同outdoor位,好有情調!餐具幾型,午市茶芥每位$3夜晚$6,茶香甘醇,甜蜜回憶$25一大壺,幾正! 


仲有外國入口嘅手工啤酒、小店特調【鐵觀音Latte】,襯點心真係出奇地夾,咁食飽都一定唔會眼瞓啦!以後飲茶同friend飲都得喇,唔使俾人話老餅!

叫咗幾款點心,已經試到師傅功力同小店嘅創意!



最正嘅係,連平時唔飲蜜瓜奶嘅PND都爆like嘅招牌【蜜瓜脆脆卷$17/3件】真係好好味!以為會炸到好脆好油好熱氣,點之完全跌眼鏡:綠色嘅脆皮係酥脆嘅,入面嘅蜜瓜奶流心幾甜,口感軟綿綿,仲有濃郁蜜瓜鮮味,食完唔覺係食完炸物!傳統得嚟夠哂潮!



新鮮嘅手拉【燒汁煙鴨胸腸粉$21】真係好值得一試,傳統嘅甜鼓油唔見咗,取而代之嘅係暗甜嘅燒汁,腸粉又薄又多摺,米香十足,煙鴨胸大大塊,比平時叉燒腸粉嘅叉燒更加濃郁惹味,幾難忘! 「青芥鮮牛肉饅頭漢堡」脆口、原汁原味,醬汁有驚喜!


吉吉點 Gut Gut Dim Sum - 頂級手工點心專門店 
#PND觀塘 
人均消費$30-60 
@觀塘宜安街7號財利大樓地下E舖 


沒有留言:

張貼留言