2015年4月19日 星期日

周記 - 天下第一流沙西多士!


西營盤通車後,西邊街、第三街、水街嘅特色食店易去咗好多!由北角過嚟西環、上年十月到開嘅呢間點心店,由早餐八點做到夜晚九點,蒸飯、腸粉、春卷、芋泥流沙包都咁多人食,lunch time成日人龍不斷,證明實力非凡!





小店有8張4-5人枱,空間感唔錯,坐得好舒服,又有電視睇,主打創意公仔點心,好似嚟緊嘅星期六,佢地就會有八爪魚包,另外當然仲有蝦多士同三款流沙西多士,有香芋、奶黃同黑芝麻,單點$18,跟餐包飲品就$26!




PND小時光食奶黃包,從來無流沙呢回事,所以大個咗,先開始中哂「流沙毒」!奶黃流沙、同西多,似乎兩樣無可能溝埋嘅食物(究竟點樣包住流沙?)終於拉埋天窗喇!



全日供應、1-2人份量嘅西多士上枱,金黃熱辣辣,用刀碰一碰,噢,非常脆。提起刀,切一切,按一按,奶黃流沙缺堤湧出,「嘩!唔係咁多呀嘩?」就係咁多,都有5-6羹,起碼,夠點成份兩層嘅西多。



講真有有啲驚辣咀,潮友要小心呀~流沙餡稀杰適中,無死甜、唔油膩、有奶香,將多士切丁、點醬,入口一流!無得輸!






店員就溫馨提示PND緊貼佢地FB,定時update咁話,都真係幾潮喎! 


周記點心 

電話:25592389 
#PND西環 #PND中式 #PND小食 #PND甜品 
星期一至日 08:00-21:00
@西環西營盤水街東利大厦地下H1號舖

沒有留言:

張貼留言