2015年4月14日 星期二

首爾三清洞 - Innisfree冰火二重奏

 
去韓國一定唔會唔記得食嘅唔少得刨冰啦!不過次次都係食士多啤梨冰﹑綠茶冰,好似有啲悶﹗PND今次就同你去食新野!

 

 
 
韓妝品牌Innisfree喺三清洞開嘅呢間JEJU HOUSE除左賣Beauty Products之外,行上二三樓仲有佢地嘅GreenCafe,PND梗係要朝吓聖啦!雖然呢個品牌既skincare最出名係綠茶系列,但佢間café嘅主打竟然係濟州漢拿峰柑橘茶同濟州柑橘冰﹗聽個名都覺得特別﹗睇埋個樣仲吸引﹗除左喺濟洲外,只此一家,真係必食!

 
 
名物濟州柑橘冰,一人份7,000won,二人份12,000won﹗用咗濟州名產細細圓圓柑橘磨蓉做果汁,一啲都唔甜膩,好清新﹗成份冰無論中心、內外、碗底都充滿酸酸甜甜嘅果汁,冰上面仲有好多爽爽脆脆嘅乾柑橘皮,令到口感更加豐富,食完一次下次再嚟都要ENCORE!
 
 
潮食友心諗:出面落緊雪咁凍仲食冰,傻的嗎?怕凍既你一定要飲埋熱濟州漢拿峰柑橘茶!漢拿峰柑橘同普通濟州柑橘品種唔同架,特點係比一般柑橘甜度更加高,所以被視為高級生果﹗成杯熱飲都有好濃郁嘅柑橘味,酸酸甜甜咁,充滿豐富既維他命C﹗感覺就好似杯感冒熱飲咁,飲完乜傷風咳都無哂﹗6,000won同喺香港飲杯咖啡差唔多,係值得參拜吓嘅!
 
 
 
 
坐埋喺窗邊位邊睇雪景邊食冰邊溫暖地(有暖氣)飲番啖熱飲真係好爽皮!

溫馨小提示1:飲完杯濟州漢拿峰柑橘茶覺得唔夠喉既你,可以喺鋪頭買一罐返屋企自己沖黎飲﹗等你重溫冬日遊韓味道﹗


溫馨小提示2:喺Innisfree Jeju House消費滿2萬won (食野/購物都得)就送你一個lukcy coin﹗落返去一樓,樓梯口隔離有部自動販賣機﹗用個lucky coin就可以抽禮物架啦﹗有sample set,亦有免費飲品卷﹗PND靜靜雞同你講:如果抽中免費飲品卷又唔想要嘅話,可以叫店員姐姐換返份sample俾你﹗
 
 
「Innisfree Jeju house」
서울특별시 종로구 삼청로 104
電話 :02-734-0585
 

沒有留言:

張貼留言