2015年5月1日 星期五

首爾惠化 - 成均館緋聞?成均館大學!


講起首爾必去點,一定會諗起梨大﹑弘大﹑明洞,今次就等PND介紹多個潮站 - 惠化俾你,等你食飽嘆飽買飽,開心double up


惠化站都算係眾多大學區之一,附近有購物街同好多新興食店 (請留意下回分解),專門做學生哥同年青人生意,潮友們一定搵到心頭好﹑食到最潮美食﹗

不如講下惠化有咩大學先啦,最出名嘅一定係成均館大學啦﹗身為韓國最最最歷史悠久嘅大學,點可以無返啲古舊建築睇下﹗



大學主要可以分為兩區,分別係舊校舍同新大樓區。舊校舍位於學校正門嘅右手邊,全部都係朝鮮嘅建築﹗最搶眼一定係丕闡堂﹗1661年之前,呢到原本係被罷黜嘅後宮同埋內人嘅居所 (慈壽宮),拆左之後,古人就喺原址用建造教育機關剩低嘅木材起左呢間丕闡堂,哇﹗原來韓國咁耐以前就咁提倡環保﹗值得學習﹗堂前面有一大片空地,周不時都會有學生喺到打羽毛球,好寫意﹗



再行入少少,就到明倫堂,即係學生最主要上堂既地方,好彩嘅話,你可以見到一大班小朋友著住韓服坐喺裡面好乖咁聽書,好得意﹗明倫堂隔離有個小圍欄圍住左兩棵銀杏樹,唔好睇小佢地,佢地有成600歲嫁啦﹗同間大學一樣咁高咁大﹗一到秋天啲葉轉晒做金黃色就好壯觀﹗

其實成均館大學嘅校園區喺韓國黎講算係細,但周圍都好靚,好多花草樹木,好多大草地,成個環境好舒服﹗唔同季節仲會有唔同嘅靚景睇  (PND爭春天嘅櫻花就集齊一套)
絕對係影寫真嘅好地方﹗













睇到呢啲相真係好想唱返首「誰也知 景色都總會換季‥‥ 誰也等 光陰每滴流逝‥‥」
如果潮友你喺惠化食完野行完街,又或者去完喺附近嘅梨花壁畫村仲有時間淨,不妨考慮黎成均館行下,感受下呢到既歷史氣息同睇下靚景﹗

靚景區推介:丕闡堂﹑明倫堂﹑Business School Building對出大草地﹑中央圖書館及對出斜路﹑正門入口直路






點去:惠化站4號出口




沒有留言:

張貼留言